藥煲

唔好睇少呢一個藥煲, 無左佢我呢個幾月都唔知點算

7月時比上司傳染重感冒, 睇左兩次西醫, 都未清得晒, 以為好番時, 又有皮膚敏感  成個8月都食藥打針.... 一停藥又黎, 個身有好多一點點紅, 好辛苦好痕... 9月轉左去睇中醫... 頭一個星期日日放工就趕去樓下商場藥房把脈執藥, 食左一個星期都無好轉. 跟住轉左去灣仔醫館睇 (貪佢近公司), 開始轉好.... 醫師話我身體太虛弱, 加上血熱, 所以就有皮膚敏感.... 我要介食牛肉, 蛋, 鴨, 鵝同海鮮....  (我的至愛都唔食得) 每次診金連執藥都$210, 睇左個多星期又一千啦! 聽阿妹講以前睇過葵涌廣場都好好, 又平, 咁岩有一次星期六病情轉壞, 所以就出左葵芳睇, 一次執左三日藥都係百四有找..... 除左介食牛肉, 蛋, 鴨, 鵝同海鮮, 原來連所有豆類都唔食得架! 有時加上感冒, 連鷄都唔食得! 結果我只可以食豬同菜   好矛盾呀, 又話我太瘦, 要食多D, 樣樣都唔食得, 都唔知點肥?? 身體太虛弱, 每次藥裡面都有當歸, 食左又好似真係無咁頭暈

係呢兩個月, 我不停同自己講我會好番的, 但係中藥的成效比較慢.... 其實我好唔開心, 但為左快D好番, 我努力保持情緒平靜... 我試過一個人躲在被裡哭, 好唔開心... 我都算幾貪靚, 所有背心熱褲無我份, 最怕BIG DAY個日點扮靚呀?

不過, 唔知係未天氣轉定係我真係好左, 呢幾日好似幾好... 十月廿六係我生日, 我希望到個日我好番啦